.

Laugarvatn Um helgina fór ég á Laugarvatn ásamt Unu Sighvatsdóttur, stúlku sem ég þekki. Á laugardeginum fórum við í sund. Hitinn var slíkur að maður fór í laugina til að kæla sig þegar ekki varð lengur þolað við á sólbekkjunum. Birtan var líka svo ægileg að það var ekki nóg að loka augunum. Handleggurinn varð að vera yfir þeim líka. Svo var haldið til í sumarbústað í Lækjarhvammi, þar sötrað rauðvín en seinna eitthvað sterkara í boði Daða og Huldu. Í gær var dálítill vindur en hitinn þó mjög mikill. Við fóru að Laugarvatni og lögðumst þar til sunds. Vatnið var þægilega svalt, maður þurfti bara smá stund til að venjast því og þá varð það þægilegt. Þar svömluðum við um lengi vel og flatmöguðum á brimbrettum, svo var farið í heitan pott og því næst tekið teningaspil í sólinni. Mér var nefnilega kennt svo ágætt teningaspil. Það kallast 10.000. Þegar reglurnar eru útskýrðar hljómar leikurinn eins og eitt hrúgald af leiðindum en það er hann ekki, sérstaklega ekki ef áfengi er haft um hönd. Reglurnar eru svona: Leikurinn gengur út á að safna 10.000 stigum, en 6 teningar eru notaðir. Hver leikmaður kastar teningunum þangað til hann fær engin stig, eða þar til hann ákveður að hætta. Fái leikmaður engin stig í einu kasti missir hann öll stigin sem hann hafði safnað í þeirri umferð. Áhættutaka er því hluti af leiknum. Eftir hvert kast verður að taka einhvern tening, einn eða fleiri, frá og safna þeim stigum sem hann gefur. Fáist stig á alla teningana getur kastarinn haldið áfram, og fær hann þá alla 6 teningana aftur. Dæmi: 1. kast: Einn ás er tekinn frá = 100 stig 2. kast: Þrír þristar eru teknir frá = 100 + 300 = 400 stig. 3. kast: Ás og fimma koma upp, gefa bæði stig = 400 + 100 + 50 = 550 stig. Leikmaðurinn hefur þá klárað teningana án þess að fá núll, og fær því alla teningana aftur og getur haldið áfram. Ás gefur 100 stig. Fimma gefur 50 stig. Þær tölur einar má hirða stakar, þ.e. einn ás eða eina fimmu. Aðrar tölur gefa ekki stig nema þær komi í pörum eða þrennum eða í röð. Þrír ásar gefa 1000 stig, en aðrar þrennur gefa tala*100. Þ.e. þrír tvistar gefa 200, þrír þristar gefa 300 o.s.frv. Þá má hirða þá teninga sem gáfu þrennuna. Hver teningur sem bætist við þrennu virkar þannig að hann tvöfaldar upphæðina sem þrennan gaf. T.d. gefa þá fjórir þristar 600 stig. Því þristaþrennan gefur 300 og það bætist einn við 300*2 =600. Fjórar fimmu gefa því 1000 stig. Sama regla gildir um tening sem bætist við fernu. Hann tvöfaldar fernuna. Fimm þristar gefa því 1200 stig, og fimm fimmur gefa 2000 stig. Hæsta kast sem er mögulegt eru því sex ásar, en þeir gefa 8000 stig. Röð gefur 1500 stig, en það verður að vera sex teninga röð 1-2-3-4-5-6. Þrjár tvennur gefa einnig 1500 stig og skiptir þá ekki máli hvaða tvennur það eru. Athugið að hagstætt getur verið að telja fjóra tvista sem tvær tvennur til að fá 1500 stig fyrir þrjár tvennur, enda gefa fjórir tvistar einungis 400 stig. Einn leikmaður er skrifari og leggur saman stigin, með blað og blýant að vopni. Þegar einhver kemst í 10.000 stig eða meira þýðir það að sú umferð sem er í gangi er sú síðasta. Hún er kláruð og sá sem kemst hæst yfir 10.000 stig vinnur leikinn. Hinn stórfenglegi teningaleikur 10.000 kemur að góðum notum þegar önnur spil eru ekki í boði, og hann er hægt að spila hvar sem er, á borði, handklæði eða bara í grasinu.

posted by Önundr @ 7/25/2005 10:01:00 f.h.