.

Borg óttans Jæja. Í dag fór Una í sumarbústað. Ég skutlaði henni niður á Shell (þið vitið, þarna samráðsfyrirtækið) við Höfðabakka þar sem hún ætlaði að hitta ferðafélaga sína. Gott og vel. Við leggjum bílnum og löbbum inn í sjoppuna. Á planinu er strákur um tvítugt og hans ektakvinna í svörtum Birgittubomsum. Þau ræða við eldri mann, á að giska 65-70 ára gamlan. Þau eru eitthvað pirruð út í hann. Eitthvað eins og eitthvað hafi komið fyrir bílinn hjá þeim yngri. Við göngum framhjá, hugsum ekki út í þetta. Þegar við erum kominn heyrast öskur að utan og sá ungi er kominn í ógnandi stellingar og kominn ofan í andlitið á þeim gamla. Hann æpir: "ÞÚ ERT BARA GAMALL OG ÓNÝTUR HELVÍTIS KALLFJANDI!" Ég geng aftur út á plan og einhver annar maður sem var þarna nærstaddur kom einnig að. Skyndilega slær stráksi í áttina að þeim gamla og reynir að berja hann. Hinn stekkur til og heldur honum og gamli fer inn í bílinn sinn. Þar er konan hans í farþegasætinu. Þetta lítur út fyrir að ætla að róast. En svo ætlar strákurinn aftur í þann gamla en sami maður stöðvar hann aftur, heldur utan um hann og segir honum að hætta þessu. Hann fer þá hinum meginn við bílinn og ætlar að rífa upp hurðina, alveg brjálaður. Við stökkvum báðir á hann. Hinn heldur honum aftan frá en ég gríp í hendurnar á honum og segi við hann eitthvað á þá leið að maður ráðist ekki á gamalt fólk. Hann nær þéttu taki á hurðinni og vill opna. Hann segir eitthvað á borð við "ég sit fyrir dómi". Veit ekki nákvæmlega hvað hann átti við, og af hverju hann var að tala um það. Gæti verið að hann væri á leiðinni í fangelsi hvort eð er og hann teldi sig því geta gert hvað sem er... veit ekki alveg hvað annað ég get fengið út úr þessu. Svo gefur sá gamli í og bíllinn fer af stað. Við nokkurn veginn slepptum af honum takinu þar sem við héldum að hann myndi sleppa takinu þegar bíllinn færi af stað. En það gerði hann ekki heldur hljóp eins og fætur toguðu með bílnum og barði svo af alefli í rúðuna hjá konunni rétt áður en hann missti takið. Rúðan svignaði undan högginu og hann hlýtur að hafa meitt sig í höndinni við þetta. Bíllinn þaut burt. Hann kom aftur inn í sjoppuna. Leit hvorki á mig né hinn manninn. Tók upp peninga úr vasanum og þrykkti þeim í borðið og keypti sér nammi. Var mjög ruddalegur við afgreiðslukonuna. Gekk út í bílinn sinn og keyrði burt án þess að hafa dælt á bílinn sinn. Það var risastór Land Cruiser á 44. tommu dekkjum, sennilega bíll pabba hans. Ég held að málið hafi gengið út á að hann keyrði á mikilli ferð inn á planið, en sá gamli var seinn að fara frá dælunni með bílinn sinn. Held að strákurinn hafi rispað jeppann eitthvað á einhverju. Þetta var mjög óljóst. Hann var reiður við gamla manninn vegna þess að hann sagðist ekki bera ábyrgð á því. Manni finnst alveg magnað hvað sumir eru hamslausir og bera ekki virðingu fyrir nokkrum sköpuðum hlut að því er virðist. Hann ætlaði að berja gamlan mann um hábjartan dag á bensínstöð vegna einhvers sem, eftir því sem ég best gat séð, var alls ekki gamla manninum að kenna. Og hvað ætlaði hann að gera ef hann hefði opnað hurðina hjá konunni, ætlaði hann kannski að berja hana líka? Láta bara einhvern finna fyrir því. Það var ekki neitt mál fyrir hann að ráðast á gamalt fólk, en hann vildi ekki slást við okkur hina allavega. Hvað í fjandanum er að svona fólki? Er hægt að vera svona án þess að vera á örvandi efnum? Spyr sá sem ekki veit. Hvað í fjandanum ætlaði hann að leysa með því að berja manninn? Heimskur gaur. Ég er svo sem ánægður með að hafa brugðist við en ekki bara staðið og horft á, en það var aðallega hinn maðurinn sem stöðvaði hann. Menn þurfa að vera tilbúnir að bregðast hratt við þegar eitthvað svona gerist, en maður veltir fyrir sér hvernig maður hefði brugðist við ef hinn hefði ekki verið þarna. Nú eða ef þetta hefði verið eitthvað vöðvabúnt. Hefði ég verið nógu snöggur, ég bara eiginlega veit það ekki... Það er nú ekki eins og ég sé vanur að standa í einhverju svona. Held ég hafi ekki slegist síðan 1996 eða eitthvað, fyrir utan það þegar unglingahópur gerði aðsúg að mér og nokkrum öðrum í Hveragerði um árið. Það er nú samt bara skemmtileg minning svona eftir á, enda hljóp ég þá og stökk upp í bíl sem Magnús Davíð Norðdahl lét spóla af stað! Ég hef semsagt flúið með stæl... Áhugavert samt að eitthvað svona gerist rétt eftir að ég skrifa færslu um Herra B!

posted by Önundr @ 1/15/2005 09:28:00 e.h.