.

Líkamsrækt II "uh-oh, tengist þessi færsla eitthvað því að ég sagði í fyrradag að mér fyndist gaurar asnalegir sem lyfta miklu meira en þeir eru augljóslega færir um, bara til að ná einhverri tölu? hef séð svona gaura í ræktinni, þeir lyfta einu sinni eða tvisvar einhverri ofurþyngd á svona tækjum bara til að geta sagt vinum sínum hvað þeir geta lyft. þá snýst líkamsrækt ekki um heilbrigði eða gott líkamsástand heldur um karlmennsku. en eins og þú segir í færslunni líta margir á líkamsrækt sem áhugamál, ekki betrunarleið í sjálfu sér." - Björn Flóki í umræðum við færsluna Líkamsræktarbjánar. Í fyrsta lagi vil ég minnast orða sem Björn sagði um daginn, þegar hann var að byrja að stunda líkamsrækt: "I wanna look good naked." Upphaflega lýsti hann því yfir að hann vildi stunda líkamsrækt fyrst og fremst til að líta betur út. Semsagt líkamsrækt sem snerist um útlit en ekki heilbrigði eða gott líkamsástand. Það má líkja því við að fara í sílikonaðgerð á maganum til að vera með flottari maga, hvað varðar tilganginn. Svo breytti Björn þessu og segist núna sækjast eftir almennri vellíðan og góðu formi. Gott og vel. Höfum svo í huga að í fyrri færslunni var ég að tala um það þegar fólk tjáir sig um líkamsrækt annarra á staðnum þegar hún er framkvæmd, án þess að hafa stöðu eða umboð til þess. Hér er það ekki uppi á teningnum. Björn fyrirlítur þá sem lyfta þungu og hafa áhuga á þeim fjölda kílóa sem þeir geta lyft. Hann ásakar þá um að vera hégómlegir og að þeir stundi ekki líkamsrækt til þess að komast í gott líkamsástand, heldur bara til að vera meiri karlmenni. Auðvitað á Björn að gera eins og honum finnst skemmtilegast og best þegar hann æfir sig. Það eiga hinir líka að gera. Það að fylgjast með því hversu mörgum kílóum maður getur lyft er einfaldlega eini almennilegi mælikvarðinn sem hægt er að hafa á það hvort maður er að ná aukningu í líkamlegri getu. Ef þú ferð í jafnmikla þyngd og þú getur þá er öruggt að þú hefur fullreynt sprengikraftinn í viðkomandi vöðvum. Bjössi er kannski ekki að leitast neitt eftir því að auka sprengikraftinn, og það er bara allt í lagi. Kannski er hann bara í fitubrennslu eða vill bara líða vel í kroppnum. En það er alveg klárt mál að ef maður sem reynir að lyfta 100 kg í bekkpressu og getur það ekki, en tekst það vikunni þar á eftir hefur náð árangri á þessari viku sem leið á milli. Ef Björn heldur enga skrá yfir það hvað hann gerir mörg sett, gerir margar endurtekningar eða notar miklar þyngdir þá hefur hann engan hlutlægan mælikvarða á það hvort hann er að ná árangri. Eins og mér hefur nú fundist það leiðinlegt til lengdar að fara í svona stöðvar (og hef ekki gert það lengi) þá var það samt alltaf skemmtilegast þegar manni gekk vel og maður náði að gera eitthvað sem maður ekki gat áður. Maður fær ekki þá ánægju ef maður hefur ekki hugmynd um hvort þetta gengur eitthvað eða ekki. Svo er það sennilega málið með þessa hégómlegu vöðvakalla sem Björn er að tala um að þeir hafa sett sér markmið fyrir æfinguna og reyna svo að ná einhverju sem þeir hafa ekki náð áður. Það tekst ekki alltaf og þá enda þeir á því að reyna eitthvað sem þeir geta ekki. Það er t.d. ekki asnalegra en þegar hlaupari fer út að hlaupa og setur sér það markmið að ná að hlaupa upp einhverja ákveðna brekku. Þegar til kastanna kemur getur hann það ekki og snýr við. Er hann þá bara asnalegur, og reyndi bara að hlaupa upp brekkuna til þess að geta sagt við vini sína að hann hefði hlaupið upp hana? Nei, hann var bara að reyna sjálfan sig til hins ýtrasta. Ég sé ekki tilganginn í því að mæta í ræktina 4 sinnum í viku og gera bara eitthvað, svona eins og maður nennir, og halda enga skrá yfir það hvað maður gerir, og auka aldrei við prógrammið þegar það er orðið of létt. Það er bara sóun á peningum og tíma. En það er bara mitt mat. Björn hefur kannski bara gaman af því að gera þetta þannig og þá er það allt í lagi. Ekki dytti mér í hug að fara að reyna að breyta því hjá honum. Hann gerir bara það sem honum finnst best.

posted by Önundr @ 11/16/2004 11:18:00 f.h.