.

Önundur hefur hægt um sig Jólafríið er alltaf mjög fljótt að líða. Það er svo kaflaskipt. Jólastressið kemur eftir prófin og helst fram að jólum. Jólin líða hjá í einhvers konar neysluæði, milli jóla og nýárs les maður dálítið, sefur frameftir og borðar afganga og eftir áramót er maður alltaf alveg að fara að byrja í skólanum. Þetta frí hefur reyndar verið einstaklega ánægjulegt. Ég rumpaði jólastressinu af á skömmum tíma. Ég slappaði af um jólin og borðaði ekki of mikið yfir mig. Jólaboðið árlega var líka betra. Ég gef því þrjár stjörnur, en venjulega hefur það varla fengið meira en tvær. Nú var bryddað upp á því að spela félagsvist eftir matinn. Sú hugmynd naut mikils fylgis og varð til mikils yndisauka. Það var mjög skemmtilegt þó svo mágkona pabba hafi kríað út sigurinn með vafasömum hætti en ávkeðin manneskja hafi verið skussi kvöldsins. Tölum ekki um það. Milli jóla og nýárs... ...þ.e. 29-31 des. fór ég svo í e-a ánægjulegustu sumarbústaðarferð lífs míns. Bústaðurinn var í eigu foreldra míns ágæta félaga Magnúsar Norðdahl. Glæsilegur bústaður. Þarna var á ferð matarboðshópurinn góði auk Hauks Heiðars Haukssonar og án Jens Þórðarsonar og Ernu Blöndal. Hvorki þau hjú né Birgir Pétur Þorsteinsson sáu sér fært að mæta og þó þau hafi verið meira en velkomin held ég að ansi þröngt hefði orðið á þingi ef fleiri hefðu verið með í för, en það hefði ekki orðið mikill vandi. Kannski þau komi næst. Hópurinn samanstóð því af: MDN, BK, GS, KMT, ÖPR, US, HHH, HF, ÞAÞ OG EBG. Hópur þessi þykir ágætlega samstilltur og hegðar sér í samræmi við almennar venjur þegar hann kemur saman. Drykkja var lítil en söngur þeim mun meiri og borðspilamennska. Þá var farið út í stjörnuskoðunargönguferð með kort HF, rölt upp í hlíðar Skarðsheiðar og að fallegum hyl í Álfsteinsá. MDN og ÖPR strengdu þar þess heit að stökkva sjálfum sér í þann hyl að sumarlagi dag einn. Það stendur...enn. Sundferð í laug Borgarness var seinna kveldið og þótti hún afar vel heppnuð. HF ók bifreið ÖPR í Borgarnes því eftir einn ei aki neinn. Þótti henni við hæfi að slökkva á ljósum reiðarinnar úti á aðalvegi um niðdimmt kvöld. Þá gerði hún einnig margt annað frumlegt við aksturinn. Nokkur bílavandi hrjáði bústaðarfara þar eð rafurmagn allt var horfið af bíl MDN þegar átti að gangsetja hann og ekki fór betur en svo að sjálfan hreppstjórann þurfti til að koma bílnum í gang. Þá vildi hinn þýzki eðalvagn ÖPR ekki í gang í frostinu fyrr en í 20. tilraun eða svo. Allir komust lífs af og voru hamingjusamari eftir ferðina en fyrir hana. ÖPR fór svo í fjós á Grund að morgni gamlársdags og líkaði vel. Flest voru handtökin enn í fersku minni og andrúmsloftið hjá Davíð og Jóhönnu rólegt. Kýrnar skemmtu sér svo auðvitað konunglega við allt þukl á þeirra júgrum. Ferð þessi fær 4 stjörnur af 4. Gamlárskvöld Ég reyndi ekki að fara að djamma. Það hefur verið reynt áður en ekki virkað. Niðurstaðan var sú að halda sig í heimahögum og láta borð- og kampavín nægja og sleppa öllum sprengiefnakaupum. Ég sá nóg af því út um gluggann. Í mat komu Þorgeir og Hrefna, Bjarni og Maddí, Jón, Unna og Una kom svo í eftirmatinn. Matur sá var allmerkilegur. Hann kallaðist ,,Himnesk súkkulaðibomba." Kaka gerð úr sykri, súkkulaði eggjum og smjöri. Ein sneið af slíkri köku ætti að geta bjargað mannslífum í öðrum heimsálfum. Mér leið eins og ég hefði syndgað þegar ég var búinn með sneiðina. Úff. Svakaleg kaka. Einkunnir ...eru væntanlegar á næstu dögum. Spennan magnast og örvæntingin með. Mikið óskaplega vona ég að ég hafi ekki fallið á neinu.

posted by Önundr @ 1/02/2003 09:52:00 e.h.